حوتة فالفران بطريقتي.....يمممم
من إعداد سوسو
اليوم درت هاد الحوتة الغدا جات غزااالة ...كلت نوريكم طريقتي فطيابها ونتمنى تعجبكم كيفما كتعجبني
بسم الله
ها الحوتة البطلة ديال الفيلم هههههههه مغسولة طبعا ومنشفة مزياااان
الخضرة المرافقة عندنا : الخيزو - البطاطا - الفلفلة الوان او خضرا لي كاين - بصلة - مطيشة - واحد الفليفلة حارة
الشرمولة ديال الحوت المعروفة : الربيع كنكثر المعدنوس على القزبور - الثومة - البزار- الملح - الكامون - التحميرة - الحار لي كيبغيه - انا كنزيد الزعتروشي مرات حتى ازير كنطحن كولشي فالبيكادورا باش كتخلط مزياااان
عاد كنديرها فطبسيل ونزيد عليها الحامض معصر وزيت الزيتون والمطيشة ديال الحك ها كيف كاتجي غزالة فنة
كنشرملو الحوتة مزيان من الداخل وبرا انا فتحتها من ظهرها باش نعمرها وطبعا راها بقات مرقدة على الاقل شي 4 ديال الساعات
فكسرونة درت مطيشة محكوكة - شوية من الشرمولة - ورقت سيدنا موسى - زيت الزيتون - واحد المربع ديال السكر باش يحيد الحموضة - ومطيشة ديال الحك والى خاص الملح والبزار نزيدو نخليوها طيب بلا ما تعقد بزاف
البطاطا وخيزو سلقتهم نص صلقة
شحرت البصلة فشوووية زيت الزيتون والملح والبزار والزعيترة وهذا هو سر البنة وبلا ما نكوليكم على الريحة لي طالعة منها كيف دايرة
نفس الشيء كذلك بالنسبة للفلفلة : تشحر فزويتة بلدية والملح والبزار والزعيترة
هاهما منين وجدو
نصلقو الروز نصف سلقة انا موالفة ندير الشعرية الصينية ولكن ما تصابتش عندي عوضتها بالروز، نصفيوه ونزيدو عليه التالي: الزيتون مقطع - الفلفلة الوان مربعات - قشرة الحامض مصير مربعات - الشرمولة ديال الحوت - الهريسة بلدية وزويتة بلدية ونخلطوه مزيان
ها المكونات ديالنا كلهم واجدين لاصوص مطيشة، الروز الفلفلة والبصلة والبطاطا وخيزو هذاك لي حدا خيزو اللب ديال الحامض مصير حتى هو كنفرتو فالاطة حتى حاجة ما تفلت
كنعمرو الحوتة بالروز
نحطوها فالاطة نفرشو وريقات سيدنا موسى ونستفو بطاطا وخيزو نسرحو لاصوص فوق الخضرة والحوتة
نسرحو لاصوص فوق الخضرة والحوتة
ثم نزيدو الفلفلة والبصلة من الفوق نزينو بالحامض ونكبو واحد الخويط ديال زيت الزيتون وواحد نص كاس ديال الما نخويوه فالجنب
وهاهي منين وجدات...نسيت ما زوقتهاش بالزيتون احمر مشا لي من بالي
وبالصحة والراحة
تعليقات
إرسال تعليق