أحسن عجينة بيتزا جربتها ساهلة و سريعة و النتيجة رائعة
من إعداد الأخت التازية
هاد الوصفة جربتها من الشاف ليلى الي كدوز فقناة فتافيت و غير جربتها طلعات رائعة اكثر من رائعة و العجينة جد سهلة و سريعة و كتساعد فالخدمة و خديت العبارات بالكوب و رجعتها بالمقادير ديالنا و غير جربوها على حسابي لاني انا جربتها اكثر من مرة و الحمد لله صدقات 100 ف 100
غادي نحتاجو
250 غ دقيق ممتاز
2 معالق كبار نيدو
2 معالق صغار خميرة ناشفة انا درت رفيعة
معلقة صغيرة ملحة
معلقة كبيرة سنيدة
2 معالق كبار زيت بلدية
كاس عنبة ماء دافي
كنخلط المقادير الناشفة كلها
ثم كنضيف الزيت و نخلط بيدي مزيان
كنضيف كاس الما كله و نجمع بيدي بلا مندلكها غير المهم تجمع العجينة و كتكون كتلصق فاليدين
كناخدها و ندلكها دلكة خفيفة فوق الطبلة غير باش تاخد شكل كورة
كنرجعها للزلافة و نغبر عليها الدقيق و نغطيها و نخليها تخمر 30 دقيقة على ما نوجد الحشو
بالنسبة للحشو (اختياري والطريقة كذلك)
100غ موتزريلا محكوكة
مطيشة مقطعة و بصلة مقطعة و تومة محكوكة
زعتر و حبق
و 2 معالق كبار زيت بلدية
كنخلط المقادير كلها و انا ضفت شوية ففلة مشلدة
هنا العجينة ملي دازت 30 دقيقة
كنطلق العجينة مستطيل
كنسرح الحشو
وكنلويها بلا منزير العجينة
و نقطعوها و نستفوها
و ندخلوها للفران الطيب حتى تتحمر
تعليقات
إرسال تعليق