الحرشة بطريقة جد ناجحة

من الاخت ام البنات

مقادير الحرشة بطريقة جد ناجحة 

  انا خديت نصف كيلو سميدة رقيقة خاصة بالحرشة ونقصت منها كاس العنبة سميد و احتفظت بيه
عوضت الكاس الي نقصت دالسميد بكاس عنبه دقيق فينو
ضفت معلقة صغيرة ماعامراش خميرة الحلوة
معلقة صغيرة خميرة دالخبز الفورية رشيشة الملح و رشيشة سنيدة
نصف الكاس العنبة زيت بلدية

  و بسست الكل مزيان
وضفت الماء و انا كنخلط و كنبسس حتى حصلت على الخليط لي فالصورة 

 تقريبا احتاجيت زوج كيسان العنبة ماء دافي
خليتها ترتاح هاد المرة 10د فقط تقريبا
ما خاصهاش تخمر غير ترتاح شوية
وفهاد 10د خليت المقلة تسخن لالالازم تكون سخووونة مزيان

للحصول على حرشة مقادة كنرش نصف كاس سميدة لي احتفظت بيه مزيان فوق الحديدة لي كنكرصوا فيها الخبز
و كنزل العجينة و نرش بالباقي و نكرصها غير شوية
نقلبها على حديدة اخرى او غطاء طاوة باش تقاد ثم نردها و نقادها
ونزلها على المقلة السخونة و نقادها لازم متكونش سميكة لانها غدي تزيد فالطياب
و باش ميجيوش صبيعاتكم باينين جيبوا معلقة ناشفة و دوزوعلى الحرشة غير بالشوية مع ضغط خفيف حتى تقادوها
خليوها تطيب على عافية مجهدة و غير تحسوا بيها تحمرات قلبوها على حديدة الخبز و ردوها للمقلة باش تبق مقادة و مسحوا اي زيادة دالسميدة غتكون نزلت منها

هاهي الحرشة بطريقة جد ناجحة واجدة